Seshii forever

20. Dezember 09

Es isch 17:55 Uhr, mir, de Paddy, de Edi und ich bereitet bim Dorfplatz une d`Fackle vor.
Es Schneeiät und ich weiss, de Sascha hett i dere Zit scho en Schneemaa, e Schneebar, und e Schlittelbahn bouet gha..
Er hätts gliebt dusse z`si.. bi jedem Wätter!
Wen wunderet`s, das es jetzt Schneeiät und Winded?

Eis ums andere chunnt, nimmt e Fackle und zünded si a! Gsehd eifach mega schön us wies immer heller wird. Mir merked das sich am Seschi siini Fründe mega freued zum det ane laufe wo sie mit ihm zäme soo mängi schöni Stunde hend chönne verbringe.
Isch es nöd das, wo eusi Chind stark macht? De Zämehalt vo soo ville unterschiedliche Junge Lüüt isch, eifach bewundernswert.
Es isch viertel ab 6i und mer laufed los, im Schneesturm.. Es isch e schöni Stimmig. De Edi und ich wächsled eus ab, de Sascha z`träge..

Tanja und de Rolf händ scho alles vorbereitet, sie händ Heissi Getränk, und z`Chnabbere debi. Mir händ am Seschi nomal welle säge wie sehr mir ihn vermissed. Leider isch es nöd möglich gsi es Füürli z`mache es hätt eifach z`fest gstürmt.
Nache me Ziitli simmer dänn zum Edi und Paddy Hei zum nochli zäme
sitze. Es sind so vill cho, das mer doch tatsächlich händ müesse astah zum innegah.. Es isch en wunderschöne Abig gsi. Danke allne nomal vo ganzem Herze. Ihr chönd sicher sii, das für eu d`Türe bim Seschi Dehei jederziit offe staht.